(1) Sospenscion no-independente: Inta sospenscion no-independente, e reue son montæ in scê doe estremitæ de un scingolo asse. Quande unna reua a se fa rebondâ, a corpisce l'atra reua, con provocâ vibrâ ò inclinâ tutto o veicolo. E machine con sto scistema de sospenscion pe commun an unna scarsa stabilitæ e conforto, ma apreuvo a-a seu construçion sencia e à l'erta capaçitæ de portâ carreghe, o l'é de spesso deuviou inte di camioin pesanti, di autobi e quarche atro veicolo particolâ.
(2) Sospenscion independente: Inta sospenscion independente, l'asse o l'é scompartio inte doe seçioin, e ògni reua a l'é montâ independentemente sotta o telaio deuviando unna molla à serpentin. Quande unna reua a se fa rebondâ, l'atra reua a no l'é influensâ, con redue ben ben e vibraçioin do veicolo e megioâ scignificativamente o conforto, sorvetutto à erta speditessa, donde o l'accresce ascì a stabilitæ. Tutte e mainee, sto tipo de sospenscion o l'é ciù complesso, o l'à unna capaçitæ de portâ ciù bassa, e o compliche ascì i scistemi de guidda e de direçion do veicolo. E ciù tante machine da passeggei deuvian unna sospenscion independente segge pe-o davanti che pe-o derê, e sta chì a l'é vegnua à ëse unna tendensa ch'a cresce. E struttue de sospenscion independente comprendan varie meñe comme o tipo de candeia, o tipo de montante MacPherson, e o tipo multi-link. O tipo de candeia e o tipo de montante MacPherson s'assumeggian inta forma, segge combiñando unna molla à serpentin che un ammortizzatô, ma differiscian scignificativamente apreuvo a-e seu differense strutturale. O tipo de candeia o deuvia unna sospenscion donde a reua a se mescia longo l'asse do perno, da-o quæ o ne vëgne o nomme (ch'o s'assomeggia à unna candeia). A seu caratteristica a l'é che a poxiçion do pin e i angoli d'allineamento da reua davanti no cangian co-o movimento verticâ da reua, cösa ch'a l'é benefica pe-a maneggiabilitæ e a stabilitæ do veicolo. O tipo de montante MacPherson o l'é unna sospenscion compòsta da un montante de sciortia à çernia e un brasso de comando ciù basso. L'ammortizzatô o peu fonçionâ ascì comme o pin de timon, in gio a-o quæ o nodo de timon o peu girâ. A seu caratteristica a l'é che a poxiçion do perno e i angoli d'allineamento da reua davanti cangian co-o movimento verticâ da reua, o conträio da sospenscion de tipo candeia. Sta sospenscion a l'à unna struttua sencia, un layout compatto, e un cangio minimo inte l'allineamento da reua davanti, co-o resultato d'unna boña stabilitæ de guidda. Donca, a sospenscion à montante MacPherson a l'é a sospenscion independente ciù deuviâ pe commun inte machine da passeggei.
